Nan Angek Garangko, sabananyo antah sia-sia sajonyo. Dikecekan Tim Sukses, namonyo indak ado tadaftar doh. Dikecekan Tim Pemenang, jauah panggang dari api. Pajako sabananyo damam politik. Ingin taliek sato berperan. Nan sabananyo indak. Paliang-paliang – ondong aia ondong dadak. Urang tadorong, inyo tajilapak.

Dalam angan-angannyo iyo acok talinteh, kok manang urang nan nyo pagaleh, nyo jojo-jojoan ko mungkin inyo kadapek kasibaran sanang. Paliang kurang inyo bisa manggaleh kacang padi bagarobak pagi-pagi di simpang ka sikolah, atau anaknyo bisa jadi Satpol PP, Satpam Bank, atau Keleneang Serpis. Yo apo nan bisa untuak anak tamaik Es Em Pe lah.

Tapi, itu kan ‘kok’. Nan ‘kok’ ko bilo? Kok kalah, baa? Inyo lah tadorong manyorak-nyorakan namo Rajo Alam Maimpik Bumi, sudahtu nyo buruak-buruakan pulo datuak Tamanih. Indak nyo pikia akibaik dari buah muncuangnyo doh. Kapa tadorong, buliah bakelok. Kato tadorong, lidah bakelok. Lidah bakelok, awak disabuik urang tak elok. Samo jo sarok.

Muih Lesuik lah lamo mandanga ciloteh Angek Garang jo Tan Kusuik ko. Hampia kasadonyo indak masuak di aka. Inyo mangecek, sarupo urang mambalah buluah. Nan ciek nyo jujuang nyo tanai kaateh. Nan ciek lai nyo injak ka tanah.

“Jadih…dunsanak bana dek Angek Garang, Pak Rajo Alam tu…?” ulang Muih Lesuik batanyo.

“Dunsanak bana…dek kawan dari bakeh kawan den…” jawek Angek Garang tasasak.

“Indak dunsanak kanduang doh?”

“Lah sarupo bana…lah labiah dari dunsanak….”

“Apo suku Angek Garang… Apo suku baliau…”

“Suku den…ampia dakek jo suku anak tirih apaknyo…”

“Anak tirih apaknyo ko nan dunsanak…?”

“Dunsanak sia…?”

“Dunsanak kawan anak den…babako ka bini mudo mamak sapasukuannyo…”

“Iyo indak jaleh tali ranji nyo dek awak doh…jauah bana keloknyo…” Muih Lesuik tagak mangirai kain saruang. Ampia kanai sunguik Angek Garang dek ujuang kainnyo.

Angek Garang tasintak. Rokoknyo tacampak dek kanai kipeh kain. Rokok masih ado satangah batang sadang lamak tajatuah ka tanah.

“Kalera…waang singajo malapuak den komah…?” Angek Garang marantak. Dipaciknyo karah baju Muih Lesuik.

“ Hehhhkhhh… manga wakden waang cakiak….kooo…?” rarau Muih.

Katiko mararau tu tangannyo malapak ka muko Angek Garang. Bibia Angek Garang sadang kanai sariawan.

Saketek sajo kanai galatiak…darah kalua. Sirah gigi Angek Garang taliek. Sabananyo indak kareh galatiak tanganko doh.. Tapi Angek Garang pucek.

“Awas.. awas….wakden lansuang ka Polsek, iko panganiayaan. Adoh pasalnyo di kuhap mah. Sadonyo maliek… basuuluah mato hari…bagalanggang mato rang banyak…sadonyo manjadi sasi”

“Manga tuuuu…? “ tanyo Tek Baya dari dalam lapau.

“Caliak lah dek Etek muncuang den dipacahnyo ko darah lah mancucua, Polsek nan manyalasaikan beko” Angek Garang baragak kalua lapau. Tangannyo malampok muncuangnyo.

Urang urang indak bareaksi. Sabab, indak adoh sarupo nan nyo kecekan tu doh. Muncuangnyo kanai ujuang kain. Sudah tu, tasingguang dek ujuang jari kalingkiang. Dek inyo sadang sariawan, kalua darah saketek. Itu nan nyo kecek an panganiayaan berat. Itu nan ka

nyo bao ka Polsek (basambuang)

Dikarang; Badawi St Pangeran

Metro Andalas 28 Mei 2015