Tan Kusuik nan bagala tukang Kusuikko, sabananyo urang upahan Rajo Angek Garang, calon Kapalo Nagari nan gadang hota. Caritonyo jikok didanga, inyo mangaku bisa ka Makah baliak hari. Urang nan malaluan galehnyo, maangkek-angkek talua, kalau lah barhasil nantik, dijamin manarimo.

Apolah nan kaditarimo, indak pulo jaleh doh. Kabakaba angin, Rajo Angek Garang kamanduduakan tim suksesnyo di tampek nan basah, ado nan kajadi kapalo banda, jadi tukang jago kolam panciang, tukang pelokan ledeang. Paliang kurang, diagiah usaho ayia isi ilang di rumahnyo.

Tan Kusuik ka diagiah karajo barayia gadang, di pamadam kabakaran. Buliah kok kadiwakia kapalo, buliah jadi bawahan kumandan. Pokoknyo…bapangkek di tampek nan barayia. Basah. Lah tabayang dek Tan Kusuik, inyo kamamacik oto basarine.

Kok Rajo Angek Garang lah jaleh, basarine otonyo, bapangawal. Tan Kusuik basarine pulo, pakai selang jo mariam ayia bagai.

Sabagai panganggur, Tan Kusuik lah maraso ado harapan basah. Bialah urang baoto sarine, awak babunyi pulo sarine . Asa ado api gadang, sarine awak marauang. Kutio tu pasti darah urang tasirok. Dimalah kabakaran kooo? Lain pulo seronyo mambuek dado urang badabok ko.

Rajo Angek Garang sabana santiang maopok si Kusuik, nan kadipabiniannyo lah cieklai.

“Kok jadi wakden duduak…nan waang baurang rumah ciek lai….” baitu Angek Garang mangecek sambia mangijokan mato ka si Kusuik.

“Ondehhh. Lah sagaekko… lai laku juo den di urang koh?” tanyo Kusuik mandaguik salero.

“Hehhh jalan kamanakan den…kamatian laki…Waang pangganti nan mati tu bisuak…”

“Wakden…mati…?” tanyo Kusuik takajuik.

“Indaaak…Waang iduik. Kamanakan den dapek laki” kato Angek Garang sambia maagiah target ka Tan Kusuik bahaso nan pantiang Datuak Indomo na kajadi lawan Angek Garang bisa kalah. “Pokoknyo, inyo kalah,” katonyo ka Tan Kusuik.

“Inyo kalah, Rajo baa? buliah kalah lo?”

“Den pikia lu yo” (Bersambung)

Dikarang: Badawi St Pangeran

Metro Andalas 7 Mei 2015