Kok bapadoman kapado kecek atau curito – Kelok jalan nan lai bapangka – Kelok lidah sumbarang jadi. Ka Makah urang buliah baliak hari,.. Di lapau, urang minum kopi satanah galeh, tapi hotanyo bisa sampai ka langik nan ka tujuah.

Nan surang mangaku sagalo tau. Nan surang lai mangaku sagalo santiang.

Nan namonyo Tan Kusuik, hutangnyo lah balmpik limpik. Nan dibahasnyo Gubernur sampai ka Presiden. Baitu pulo Angek Garang, suaronyo kareh, ayia liuanyo bapetai. Keceknyo hampia indak ado nan bisa dimangarati. Urang lain buruak sajo dimatonyo.

Nan santiang…hanyo urang nan maagiah inyo balanjo. Gabungan Tan Kusuik jo Angek Garang sarupo bagabuangnyo lapek jo daun. Lapek dimakan urang, nan daun dicampakkan ka

tong sarok.

“Si Tamanih nan jadi Wali Nagari kini ko…indak bisa dipartahankan lai doh…” kecek Tan Kusuik.

“Iyo batua kecek waang tumah. Awak paralu nan baru…Nan bakarajo. Nan tau jo awak nan ketek ketekko…”sambuang Angek Garang.

Muih Lesuik nan duduk di suduik paruiknyo marumeh. Sajak tadi kantuiknyo tatahan. Kini, dek muak mandanga kecek urang.

Brruuik… Badarun angin dari palapasannyo. Angek Garang tasingguang. Talingo turiaknyo jadi sirah sarupo sago.

Inyo kamahampok si Muih Lesuik jo saok boto. Tapi dek si Lesuik ko batanyo, mau tak mau inyo manjawek.

“Sian nan karancak jadi Wali Kampuang awakko…”

“Ohhh itu partanyaan santiang… indak samo jo kantuik waang tadi doh. Untuang waang tanyo kok indak…tibo saok boto ko ka kaniang waang”

“Sian an patuik kito picayo jadi pamimpin…?” ulang Muih Lesuik mampaelok an duduak.

“Haaa. Sabalun den jawek ambiak dek waang rakik maco tu ciek. Mintak rokok sabatang. Mintak kopi satangah lai…” Angek Garang nan biaso angek, kini jadi ramah babaso. Si Muih Lesuik nan sadang apa inak manyio nyiokan baso Angek Garang ko doh. Kopi dimintaknyo ciek, tapi rokok satangah. Katupek lontong sapiriang manyampa lambuang.

“Lai tau waang sia pamimpin nagari awak salamoko ?” Muih Lesuik tatagun. Tapi inyo ingek namo Wali Kampuang, Pak Datuak Tamanih.

“Datuak Tamanih…Datuak Tamanih…tau ambo…” keceknyo manapuak meja.

“Haaa Itu nan ka kito ganti…. Kito piliah Wali Nagaeri nan baru….”Angek Garang baiyo ka Tan Kususik. Kaduonyo samo maangguak.

“Baa mangko diganti…Apo kurangnyo…?” tanyo Muih Lesuik sambia manduduik rokok nan nyo baka.

“Banyak salahnyo, saungguak kakurangannyo…”

“Oh yo? Apo apo tu nan paliang taraso?” sambuang Muih Lesuik.

“Waang lai tau apo nan nyo karajoan hah?” Sasak Angek Garang mambulalak.

“Tau bana tantu indak, awak rakyat Tapi nan tampak…lai saketek saketek. Bunyi jo soraknyo iyo kurang tapi karajonyo la taraso…”

“Phaaaaaam” Angek Garang mandaram meja. Kopi nan dimintak alun baminun tadi tatunggang.

“Waang….pakak atau gilo…? Lai baincek mato waang…?”

“Baa baitu …? Ambo hanyo mangecek an nan ambo tau…Baa mangko bangih ?”

“Waang sakik. Utak aang lah mahereang. Pakak iyo. Gilo iyo…”

“Kok pakak wakden, ndak tadanga kecek waang dek aden doh. Kok Glo wakden…lah mangecek

surang wakden…”

“Baa koki ndak pakaka. Ndak tadanga dek waang, jalan kanakan den… ka maju jadi calon Wali

Kampuang ko? Rajo Alam Manampiak Bumi…Jalan kamanakan dek kawan den. Kamanakannyo ko nan punyo kawan…kamam bao calon baru untuak nagari awak…”

“Oooo iyo…? Elok tumah.” Baleh Muih Lesuik,.

“Baa urangnyo lai kamambangun kampuang awak?”

“Eh? Kawan dakek den mangecek. Kawannto nan bakamanakan ka bako induak tirih ayah apak mamak dunsanak den.… Kamanakannyo ko bakawan jo Calon Wali awakko”

“Ondeh…jauah bana kelok sangkuiknyo mah…?” runguik Muih Lepoh mangaruik kaniang.

“Indak jauah doh…Kawan dakek den bana…” ulang Angek Garang.

“Kawan dakek bana…?” kaja Muih Lesuik.

“Kawan dakek den ko bakawan. Kamanakannyo bakawan jo Bako bini den.

“Oh yo ? “ sambuang Muih Lesuik tacangang maangguak – angguak.

“Bako bana dek bini deb, bakawan jo kawan anaknyo. Apak dari kawan anaknyo ko nan kamaju. (basambuang)

Dikarang: Badawi St Pangeran

Metro Andalas 21 Mei 2015