Tan Kusuik taduduak sarawanyo nan lapuak tantang pisak, tdinya lah ratak juo. Kini takuyak gadang. Kalau sajo inyo indak mamakai sarawa kotok lah jaleh tasumbua “anak kuciang itam†Tan Kusuik dari situ. Untuang lah sarawa kotok sirah lai manutuik.
Tek Baya indak paduli, tampak atau tajulua anak kuciang Tan Kusuik doh. Dek inyo, nan paantiang, ganti sado galehnyo nan taserak. Mangkuak salapan, pinukuik ampek, goreang anam, lapek sapuluah, karupuak satangah belek. Sudah tu ado lo galeh kaco ampek, katan bakarambia satenong ketek. Kalau dietong haragonyo, labiah limo puluah ribu. Mungkin anam atau tujuah puluah. Walau ado nan bausaho manyabakan, Tek Baya indak amuah didamaikan saketek juo doh. “Bakarilaan sajo awak baa Baya…?†Tanyo Tan Kusuik sambia maringih kasakitan.
“Baa? Bakarilaan? Bakalera-an baa mukasuik waang?†baleh Tek Baya jo berang.
“Anu…. aden kan sakik juo kanai meja etek mah…?†sambung Tan Kusuik manggauik tulang kariangnyo.
“Sakik waang indak karano wakden. Sia nan manyuruah waang malajaang-lajang di lapau wakden? Kaki waang nan mandokak. Jaga wakden aniang aniang sajo di ateh mejanyo waang cuboan makan kaki waang ka jaga den….apo mukasuik waang?â€
“Wakden sadang manyampaikan pasan politik Iko indak tangguang jawab den surang ko doh…ati ati Etek mangecek…urang gadang di balakang den..bara bana harago jaga Etek? Jo lapau lapau ko nyo bali mah. Ijin manggaleh Etek bisa nyo cabuik mah.â€
Mandanga kecek Tan Kusuik tu, Tek Baya tambah taburansang.
“Baa? Ijin manggaleh den ka nyo cabuik? Lidah waang tu bisa den cabuik dulu. Sia bana di balakang waang hahh?â€
“Heheh heh…ndak tau Etek, nankamanjadi rajo di nagari ko?†baleh Tan Kusuik jo tangan di pinggang.
“Rajo? Rajo caciang, rajo ula, rajo kabau, ndak jaleh di wakden. Aden manggaleh di tanah wakden. Di lapau wakden… Sia bana inyo…?â€
“Etek indak mandanga namo Rajo Angek Garang?… Inyo nan ka manjadi panguaso di nagari nangko. Kalau balawan jo inyo, taniayo. Inyo manang nantik…babayia utang….pariuak Etek bisa tatungkuik….tau?â€
“Waang mangecek, muncuang waang baranak lancik ayam nampak di den…..jajok wakden. Nan waang sia? Apo fungsi waang?â€
“Wakden Bujang Kusuik. Tim Pemenang. Tim Sukses… Di tangan den….namo namo urang nan kadibantu. Di tangan wakden, namo namo urang nan ka dicampakan…â€
(bersambung)
Dikarang: Badawi St Pangeran
Metro Andalas, 30 April 2015