Heboh pakaro managak an urang lain. Nan diri awak bana indak jaleh duduaknyo. Ka maanjuangkan dunsanak urang manjadi Gubernur, nan dunsanak awak bausulkan jadi Klening Serpis. Itu kalau calon nan diusuang lai manang. Kalau kalah…, indak jadi manolong kamanakan jadi Klening Serpis doh. Bisa bisa… Awak bana nan maosoh lantai.
Kalau sakadar manggadangkan lubang iduang sajo, mungkin masih dapek ditarimo aka, walau aka ciluah sakalipun. Tapi, mamburuak buruak an urang nan indak manggaduah, itu iyo ndak dapek ditarimo utak jo hati doh. Contohnyo. Semi muntuak mancari jalan masuak rumah bagonjong, bapaulek an garam urang. Bakecek an Gubernur nan duduk kini…indak bakarajo. Antah dari ma inyo mamandang.
“ Cubolah caliak…ma parubahan di nagari ko…Cubo etong…” baitu Angek Garang panah maarang.
Ha haha…Kalau lai maliek jo mato sarato hati nan barasiah…Pasti tau…” jawek Tan Kari, urang nan sarik mangecek Tapi, dek karano lah panuah banan,inyo mangecek lai..
“Baa mukasuik maliek jo hati sarato mato nan barasiah tadi tuh…?’ ulang Angek Garang mambulalak an mato.
“ Indak basuluah batang pisang. Basuluah bulan jo matio hari. Bagalanggang mato rang banyak…tampak dek awak apo nan lah barubah kini…Dek Angek Garang, apo nan indak tampak…?”
Angek Garang tadiam sabanta. Kincia kincianyo mulai baputa. Kok ka dijawek, awak indak ado ilimu etong maetong ko doh. Kini…inyo takanan pakaro angko jo etong.
“ Angko angkonyo ndak tampak di den…”danguih si Angek Garang.
“ Angko angko apo….Angko angko apooo…?’ sasah Tan Kari.
Angek Garang sabananyo, alun manarimo “mahar” dari calon nan kadianjuangkannnyo. Hanyo sakali, makan sate di tapi lauik…Teh botol ciek…Rokok satangah….Itu sajo. Nan lain alun ado.
“ Kok den puta haluan baa …? Lai ado angko angkonyo…?” tanyo Angek Garang agak bimbang.
Urang nan mandanga kisiak dek galak. Indak pulo militan si Angek Garang ko ruponyo doh. Angko angko kadietongnyo.
Tan Kari, tamasuak urang nan bautak janiah. Inyo tau bana isi paruik si Angek Garang Inyo nan paralu ampera sabungkuih nyo…rokok gak duo batang.
.”Kok den balian Lontong satangah…rokok duo batang…lai amuah ?’ tanyo Tan Kari.
Angek Garang tasintak. Paruiknyo lansuang babunyi. Kampuang tangah tu bana nan kosong, ba bao bacurito politik. Naiak galang galang buliah (bersambuang)
Dikarang; Badawi St Pangeran
Metro Andalas, 4 Juni 2015